Ziara ya Mhe.Balozi wa Tanzania katika Jiji la St. Petersburg na Mkoa wa Leningrad, Februari 2025: Kuimarisha Mahusiano ya Tanzania na Urusi.

Mheshimiwa Balozi wa Tanzania nchini Urusi, Mhe. Frederick Ibrahim Kibuta, alifanya ziara rasmi kati ya tarehe 24-28 Februari 2025 katika Jiji la St. Petersburg na Mkoa wa Leningrad kwa lengo la kuimarisha ushirikiano wa kidiplomasia, biashara, elimu, utalii na uwekezaji kati ya Tanzania na Urusi. Alikutana na viongozi mbalimbali akiwemo Mwenyekiti wa Kamati ya Mahusiano ya Kimataifa wa St. Petersburg na Gavana wa Leningrad, ambapo walijadili mikakati ya kuendeleza ushirikiano wa pande zote. Mhe. Balozi pia alitembelea vyuo vikuu, viwanda vya usindikaji chai na kahawa, na taasisi za madini, akisisitiza umuhimu wa kuboresha ushirikiano wa kitaaluma na kiuchumi. Ziara hii imedhihirisha dhamira ya Tanzania kuendeleza mahusiano ya karibu na Urusi na kufungua fursa mpya kwa Watanzania katika nyanja mbalimbali. Mwisho, Balozi alitoa shukrani kwa viongozi wa Urusi kwa ushirikiano na kuahidi kuendeleza mahusiano hayo kwa manufaa ya pande zote mbili.